"Liverpul" so‘nggi transferlar oynasida xuddi asalaridek tinmadi. Klub yozda yarim himoyani butunlay yangilagan edi. Yaxshi va aqlli xaridlar sababli, ayni damda Klopp jamoasi APL va YELni yutish uchun favoritga aylanib oldi. Shunga qaramay, mavsumning ikkinchi yarmi ko‘p narsani hal qiladi. Shuni yodda tutgan holda, tarkibni yanada kuchaytirish kerak. "Liverpul" yozda 4 ta futbolchi sotib olgandi. Yanvarda ham yangi xaridlar bo‘lishi aniq. Quyida bu jamoa kimlarni ko‘zlayotganiga e’tibor qaratamiz.
Tayanch yarim himoyasi
"Liverpul" anchadan beri okeanortidan futbolchi sotib olishni reja qilmoqda. "Fluminense" yarim himoyachisi Andre mersisaydliklar radariga tushgan. 22 yoshli futbolchi butun Yevropa klublari radarida turibdi. Andre uchun "Arsenal" va "Fulxem" ham da’vogarlik qilishi aytilgan.
Yana bir variant bu "Lids Yunayted" tarbiyalanuvchisi Archi Greydir. 17 yoshli futbolchini "Lids" sotmoqchi emas. Ammo "Liverpul" yaxshi taklif bilan chiqib, uni o‘ziniki qila oladi. Klopp ro‘yxatidan yarim himoya uchun Joau Nevish ham joy oldi. "Liverpul" noyabr oyidayoq 19 yoshli "Benfika" yulduzini kuzatish uchun skautlar jo‘natgan edi.
Markaziy himoya
"Liverpul" himoya uchun ham Braziliyadan futbolchi sotib olishi mumkin. "San-Paulu" yulduzi Lukas Beraldo allaqachon mersisaydliklar tomonidan kuzatuvda. 20 yoshli himoyachi barqaror va ishonchli o‘yini bilan ajralib turadi. Ammo unga "PSJ" ham da’vogar ekanini hisobga olsak, Beraldo xaridi oson kechmasligi aniq.
Keyingi ehtimoliy xarid "Sporting" futbolchisi Gonsalu Inasiudir. 22 yoshli futbolchi shartnomasida 60 million yevrolik tovon puli bor. Shuning uchun bu variantni o‘ylab ko‘rish kerak. Inasiuga "Real" ham qiziqish bildirgan.
Agarda bu reja o‘xshamasa, u holda Bundesliga yulduzi, "Bayer 04" vakili Jonatan Taga taklif yuborib ko‘rish mumkin.
Hujumchi
"Liverpul" hujumida muammolar ko‘zga tashlana boshladi. Klopp qo‘lida bor resurslar bilan istalgan natijaga erisha olmasligi mumkin. Negaki, Nunyes, Luis, Jota va Gakpo kabi nomlar yetarlicha natija qayd eta olmayapti. Shu sababli "Liverpul" "PSV"dan yana bir vinger xarid qilishga urinib ko‘radi. Yoxan Bakayoko Mersisayd klubining navbatdagi "o‘ljasi" bo‘lishi mumkin. 20 yoshli vingerga "Brentford" ham jiddiy qiziqish bildirgan.
"Borussiya Dortmund" yulduzi Yussuffo Mukoko esa keyingi variant. U yanvarda ijaraga berilishi mumkin. Negaki, yosh hujumchi Yevro-2024da Germaniya sharafini himoya qilishni istaydi. Shu sabab unga ӯyin vaqti zarur. Klopp Angliyaga kelganidan beri biror marta sobiq klubidan futbolchi sotib olga emas. Balki, Mukoko xaridi ilk yurishga aylanar? Yana kim biladi deysiz...
ISMATOV J.
