Futbol matbuotini haftadan haftaga Turkiya futboliga daxldor kutilmagan va mojaroli xabarlar qoplamoqda
Hakamlik borasida ko‘tarilgan mojarolardan keyin navbat mamlakat superkubogi uchun o‘yin atrofidagi voqealarga keldi.
Superkubok o‘yini nega qoldirildi?
Turkiyaga superkubogi uchun o‘yin 29 dekabr kuni Saudiya Arabistonida o‘tkazilishi kerak edi. Biroq «Galatasaroy» va «Fenerbaxche» o‘rtasidagi uchrashuv start hushtagiga atigi 10 daqiqa qolgan pallada bekor qilindi. Bunga futbolchilarga Turkiya Respublikasi asoschisi Mustafo Kamol Otaturk tasviri tushirilgan futbolkalarni kiyish va uning shiori yozilgan bannerlarni ko‘rsatish taqiqlangani sababdir. Ta’kidlanishicha, Ar-Riyod hokimiyati yana jamoalardan Turkiya madhiyasini qo‘ymaslikni so‘ragan. O‘yin tashkilotchilari esa klublar kelishuv shartlarini bajarmaganini ma’lum qilishdi. «Avvalo, qardosh Turkiya bilan turli sohalar, jumladan, sportda yaqin aloqamiz borligidan faxrlanishimizni ta’kidlamoqchimiz. O‘yinni o‘z vaqtida va xalqaro qoidalarga muvofiq o‘tkazishni xohlagandik. Qoidalar esa barchasini sportga daxli yo‘q shiorlarsiz tashkillashni taqozo etadi. Hammasi Turkiya futbol federasiyasi bilan muhokama qilingan va o‘yin reglamentida ham qayd etilgandi. Turkiyaga hurmat doirasida stadionda davlat madhiyasi yangrashi va tribunalarda turk bayroqlari ko‘tarilishiga ruxsat berildi. Shunga qaramay, ikki jamoa ham kelishilgan qoidalarga amal qilmadi, oqibatda o‘yin bekor bo‘ldi», — deya bayonot berdi superkubok tashkilotchisi Riyadh Season. Qayd etilishicha, turk klublari mamlakat mustaqilligining 100 yilligi munosabati bilan Saudiyada Mustafo Kamol Otaturk surati tushirilgan liboslarda maydonga tushishni istagan. O‘yin bekor qilingach esa, «Galatasaroy» va «Fenerbaxche» delegasiyasi darhol Ar-Riyoddan Istanbulga qaytdi.
«Beshiktosh»dan tezkor taklif - Turkiya superkubogi o‘yinini qabul qilishga tayyor klub bor. «Bizning eshiklarimiz ochiq! Respublikamiz 100 yillik to‘yi sharafiga o‘tkaziladigan superkubok o‘yinini qabul qilishga tayyormiz. Otaturk muxlislarini Turkiya bayroqlari ostida «Dolmabaxche» stadionida kutamiz», — deyiladi «Beshiktosh» bayonotida.
Erdogandan munosabat
Turkiya prezidenti Rajab Toyyib Erdogan ham Turkiya superkubogi uchun o‘yin bekor qilinganiga alohida izoh berdi. «Turk sporti, ayniqsa, futbolimiz janjal emas, yutuqlar bilan kun tartibiga chiqishini istardim. Sport kundalik siyosiy raqobat «o‘lja»siga aylanmasligi kerak. Buning sportimizga hech qanday nafi yo‘q. Ushbu voqea fonida shou yoki provokasiya nishoniga tushmasligimiz kerak. Bunga aslo yo‘l qo‘yolmaymiz», — deya Turkiya rahbari so‘zlarini keltirdi Ajansspor.
Aytgancha, «Rizespor»ga qarshi o‘yin (Superliga 15-turi)dan so‘ng bosh hakam Xalil Umut Melerga musht tushirgan «Anqaragyujyu» klubi sobiq prezidenti Faruk Koja sud vaqtigacha hibsdan ozod etildi. Fanatik nashrida yozilishicha, qolgan ayblanuvchilar hamon panjara ortidalar. Eslatma, Turkiya futbol federasiyasi Kojaga nisbatan bir umrlik diskvalifikasiya chorasini qo‘llagandi.
