"Liverpul" markaziy himoyachi Joel Matip o‘rniga "Kristal Pelas" futbolchisi Mark Gexini asosiy maqsad qilib oldi.
32 yoshli Matip uchun mavsum dekabr oyining boshida tizzasidagi jarohat sababli yakunlangan edi.
Shu bilan birga, bu Matip "Liverpul"dagi faoliyatiga yakun yasaydi, chunki "mersisaydliklar" Joelning mavsum oxirida tugaydigan shartnomasini uzaytirishni rejalashtirmagandi.
Markaziy himoyachi bilan shartnoma imzolash "Liverpul"ning yozdagi ustuvor vazifalaridan biri bo‘lib, bu faqat Matip haqida emas. "Qizillar" sardori Virjil van Deyk iyul oyida 33 yoshga to‘ladi.
"Liverpul" yanvarda markaziy himoyachi sotib olish zaruratini ko‘rmayapti, chunki bosh murabbiy Yurgen Kloppda van Deykdan tashqari, har tomonlama o‘yinchi Jo Gomes va umidli Jarel Kuansa ham bor.
Daily Mirror nashri xabariga ko‘ra, bu yozda "Liverpul"ning markaziy himoyachilar uchun birinchi raqamli maqsadi 23 yoshli Gexi bo‘ladi, u uzoq vaqt davomida o‘zini Premyer-liga darajasida ko‘rsatgan va Angliya terma jamoasiga chaqirilgan.
