Ayni paytda Turkiyada o‘quv-mashg‘ulot yig‘inini olib borayotgan «Navbahor» bugun Bolgariyaning “Spartak” (Varna) klubiga qarshi navbatdagi nazorat bahsini o‘tkazdi.
Mazkur o‘yinda “Navbahor” bosh murabbiyi Samvel Babayan quyidagi futbolchilarni maydonga tushirdi:
Aleksandr Lobanov, Filip Ivanovich, Alijon Alijonov, Ibrohim Yo‘ldoshev, Azimjon Ahmedov, Siyavash Haqnazari, Abrorbek Ismoilov, Toma Tabatadze, Yovan Jokich, Asadbek Sobirjonov, Ozodbek O‘ktamov.
Zaxiradan maydonga tushganlar: Dostonbek Abdulhayev, Navro‘zbek Iminjonov, Ruslanbek Jiyanov, Giorgi Nikabadze.
Ushbu bellashuvda bolgariyaliklar 2:1 hisobida g‘alaba qozonishdi. Ta’kidlash joizki, uchrashuvdagi barcha gollar 1-bo‘limda urildi.
“Spartak” futbolchilari bahsning 16 va 19-daqiqalarida to‘p kiritishgan bo‘lsa, 22-daqiqada mazkur o‘yinda jamoamizni sardor sifatida maydonga boshlab tushgan tajribali yarim himoyachi Azimjon Ahmedov 20 metrlar chamasi uzoqlikdan varnaliklar darvozasini aniq nishonga olgan holda, hisobdagi farqni qisqartirdi – 2:1.
Garchi 2-bo‘limda “lochinlar” muvozanatni tiklashga harakat qilishgan bo‘lsada, hujumlar yakuniga yetmadi hamda hisob o‘zgarishsiz qoldi.
“Navbahor” PFK matbuot xizmati.
