Айни пайтда Туркияда ўқув-машғулот йиғинини олиб бораётган «Навбаҳор» бугун Болгариянинг “Спартак” (Варна) клубига қарши навбатдаги назорат баҳсини ўтказди.
Мазкур ўйинда “Навбаҳор” бош мураббийи Самвел Бабаян қуйидаги футболчиларни майдонга туширди:
Александр Лобанов, Филип Иванович, Алижон Алижонов, Иброҳим Йўлдошев, Азимжон Аҳмедов, Сияваш Ҳақназари, Аброрбек Исмоилов, Тома Табатадзе, Йован Жокич, Асадбек Собиржонов, Озодбек Ўктамов.
Захирадан майдонга тушганлар: Достонбек Абдулҳаев, Наврўзбек Иминжонов, Русланбек Жиянов, Гиорги Никабадзе.
Ушбу беллашувда болгарияликлар 2:1 ҳисобида ғалаба қозонишди. Таъкидлаш жоизки, учрашувдаги барча голлар 1-бўлимда урилди.
“Спартак” футболчилари баҳснинг 16 ва 19-дақиқаларида тўп киритишган бўлса, 22-дақиқада мазкур ўйинда жамоамизни сардор сифатида майдонга бошлаб тушган тажрибали ярим ҳимоячи Азимжон Аҳмедов 20 метрлар чамаси узоқликдан варналиклар дарвозасини аниқ нишонга олган ҳолда, ҳисобдаги фарқни қисқартирди – 2:1.
Гарчи 2-бўлимда “лочинлар” мувозанатни тиклашга ҳаракат қилишган бўлсада, ҳужумлар якунига етмади ҳамда ҳисоб ўзгаришсиз қолди.
“Навбаҳор” ПФК матбуот хизмати.
