Tailand terma jamoasi himoyachisi Elias Dolah Osiyo kubogi 1/8 final bosqichi doirasida bo‘lib o‘tadigan O‘zbekistonga qarshi o‘yin oldidan o‘z fikrlari bilan o‘rtoqlashdi.

"O‘ylashimcha, murabbiyning har bir narsaga diqqat bilan e’tibor qaratishi natijasida biz guruh bosqichida gol o‘tkazib yubormadik. Bu murabbiy va futbolchilarning hamkorlikdagi mehnati samarasi, deb o‘ylayman. Har bir o‘yinda shunday harakat qilishimiz kerak.

O‘zbekistonni mag‘lub eta olishimizga ishonchim komil. Bizda yaxshi reja bor. Albatta, biz gol o‘tkazib yuborishni istamaymiz. Bu o‘yinning borishiga ta’sir ko‘rsatadi. Ammo dastlab gol urib olib, keyin qarshi hujumga tayanib harakat qilsak, ishonchim komil, keyingi bosqichga chiqamiz.

Qatarda imkon qadar uzoq vaqt qolmoqchimiz. Bu yerda mashg‘ulotlar uchun yaxshi sharoit yaratilgan. Albatta, ilk maqsadimizga erishdik. Ammo murabbiyimiz yana 4 ta o‘yinda ishtirok etishimizni istamoqda. Demak, finalgacha yetib borishni xohlaymiz. Murabbiy bizni bunga ishontirmoqda», — dedi Elias.