Bugun poytaxtimizda start olayotgan og‘ir atletika bo‘yicha qit’a birinchiligi doirasida Osiyo og‘ir atletika federasiyasining navbatdagi Kongressi o‘tkazildi.

Tadbirda Xalqaro og‘ir atletika federasiyasi (IWF), O‘zbekiston Respublikasi Sport vazirligi, O‘zbekiston MOQ, Osiyo og‘ir atletika federasiyasi rahbariyati ishtirok etishdi.

Kongressni IWF prezidenti Muhammad Jalud ochib berdi va Toshkent yana bir bor tashkiliy jihatdan musobaqaga a’lo darajada tayyorgarlik ko‘rgani, mehmonlar uchun barcha sharoitlar yaratib berilgani haqida to‘xtaldi.

O‘z navbatida, Sport vaziri Adham Ikramov davlatimiz tomonidan og‘ir atletika sportini rivojlantirishga qaratilayotgan e’tibor xususida to‘xtaldi. Shuningdek, MOQ Bosh kotibi Oybek Kasimov O‘zbekiston tomoni chempionatga jiddiy tayyorgarlik ko‘rgani haqida gapirib, musobaqa ishtirokchilariga omad tiladi.

Kun tartibiga muvofiq, tashkilotning so‘nggi 1 yil davomida har bir yo‘nalishda amalga oshirgan ishlari tahlil qilinib, oldinda turgan musobaqalar va boshqa sport tadbirlariga ko‘rilayotgan tayyorgarliklar muhokama qilindi.

Xususan, 2025-yil o‘tadigan o‘smirlar va yoshlar o‘rtasidagi qit’a birinchiligi Hindiston, kattalar o‘rtasidagi bahslar mezbonligi esa Xitoy davlatiga ishonib topshirildi.

Tadbir davomida rasmiylar o‘zaro hamkorlikning yangi rejalari xususida fikr almashishdi.