Dortmundning "Borussiya" klubi rahbariyati 34 yoshli hujumkor yarim himoyachi Marko Roys bilan shartnomani uzaytirishni maqsadga muvofiq deb hisoblamaydi. Bu haqda Bild xabar bermoqda.

Manba bergan xabarga ko‘ra, "asalarilar" bosslari ayni damda Roys faqat "o‘nlik" pozisiyada foydali bo‘lishi mumkinligiga ishonishadi va uning o‘rniga yoshroq futbolchini qo‘yish yanada oqilona variant bo‘ladi, deb o‘ylashadi.

Qayd etilishicha, "Borussiya" Roysga ma’muriy lavozim taklif qilib, uni klubda saqlab qolish niyatida.

Avvalroq OAVda germaniyalik futbolchi futbolchilik faoliyatini davom ettirmoqchiligi va “Borussiya” uning mehnat shartnomasini uzaytirmasa, boshqa klubga o‘tish variantini ko‘rib chiqayotgani haqida ma’lumotlar paydo bo‘lgandi.

Roys 2012 yildan beri dortmundliklar safida o‘ynab kelmoqda. Bu davrda u barcha turnirlarda 411 ta uchrashuvda qatnashib, 167 ta gol va 124 ta golli uzatmani amalga oshirgan.