Osiyo kubogi chorak final bosqichidan o‘rin olgan Qatar va O‘zbekiston terma jamoalari o‘rtasidagi o‘yin jamoalarning o‘zaro 15-to‘qnashuvi bo‘ladi.

Terma jamoamiz eng ko‘p o‘yinni Janubiy Koreyaga qarshi o‘tkazgan bo‘lsa (16 ta), BAA bilan 15 marta to‘qnash kelgan.

Qatarga qarshi 14 ta bahsning 9 tasida g‘alaba qozonganmiz. Shu paytgacha hech bir jamoa ustidan buncha ko‘p g‘alabaga erishmaganmiz. Faqat Turkmanistonni ham 9 marta mag‘lub etganmiz (10 ta o‘yindan).

Qatar esa 3 marta g‘alaba qozongan, 2ta o‘yin esa durang bilan tugagan.

Terma jamoamiz Qatarga qarshi o‘yinlarda raqib darvozasiga 14 ta gol urgan. Bu borada bizning "sevimli" jamoalarimiz — Turkmaniston (27), Taypey (30) va Malayziya (24) hisoblanadi.

O‘zbekiston terma jamoasi rasmiy o‘yinlar doirasida Qatarga so‘nggi marta 2008 yilning 6 sentyabr kuni yutqazgan. O‘shanda JCH saralash bosqichi doirasida raqibga 0:3 hisobida mag‘lub bo‘lgandik.

Shundan buyon jamoalar rasmiy bahslar doirasida 6 marta to‘qnash kelishgan (3 martadan Toshkent va Dohada) va ularning barchasida O‘zbekiston g‘alaba qozongan. To‘plar farqi — 14:1.