Germaniyada Fisher nomidagi Freestyle Chess G.O.A.T Challenge shaxmat turnirida davraviy tizim yakuniga yetdi. Shaxmatchilar rapid tizimida o‘zaro bir martadan o‘ynab chiqishdi.

Nodirbek Abdusattorov kecha 4 o‘yindan 3 ochko jamg‘argan bo‘lsa, hamyurtimiz bugun 3 partiyada 2,5 ochko to‘pladi. Nodirbek bugun Keymer bilan durang o‘ynagan bo‘lsa, Domaradju Gukesh (Hindiston) va Magnus Karlsen (Norvegiya)ni mag‘lub etdi.

Natijada Abdusattorov 7 imkoniyatdan 5,5 ochko to‘plab davraviy tizim g‘olibiga aylandi.

Ertaga pley-off bahslari orqali turnir g‘olibi aniqlanadi. O‘zbek shaxmatchisi chorak finalda xitoylik Ding Lirenga qarshi to‘qnash keladi. Liren 7 o‘yinda bor-yo‘g‘i 0,5 ochkoga ega bo‘ldi.

Pley-offda Tomonlar bir martadan oq va qora donalarda o‘ynaydi. Agar durang qayd etilsa, blis tizimida 2 ta o‘yin o‘tkazishadi. Yutgan shaxmatchi yarim finalga chiqadi.

Chorak final juftliklari:

Nodirbek Abdusattorov (O‘zbekiston) - Ding Liren (Xitoy)
Vinsent Keymer (Germaniya) - Levon Aronian (AQSH)
Fabiano Karuana (AQSH) - Domaradju Gukesh (Hindiston)
Alirizo Feruja (Fransiya) - Magnus Karlsen (Norvegiya)