Германияда Фишер номидаги Freestyle Chess G.O.A.T Challenge шахмат турнирида давравий тизим якунига етди. Шахматчилар рапид тизимида ўзаро бир мартадан ўйнаб чиқишди.
Нодирбек Абдусатторов кеча 4 ўйиндан 3 очко жамғарган бўлса, ҳамюртимиз бугун 3 партияда 2,5 очко тўплади. Нодирбек бугун Кеймер билан дуранг ўйнаган бўлса, Домараджу Гукеш (Ҳиндистон) ва Магнус Карлсен (Норвегия)ни мағлуб этди.
Натижада Абдусатторов 7 имкониятдан 5,5 очко тўплаб давравий тизим ғолибига айланди.
Эртага плей-офф баҳслари орқали турнир ғолиби аниқланади. Ўзбек шахматчиси чорак финалда хитойлик Динг Лиренга қарши тўқнаш келади. Лирен 7 ўйинда бор-йўғи 0,5 очкога эга бўлди.
Плей-оффда Томонлар бир мартадан оқ ва қора доналарда ўйнайди. Агар дуранг қайд этилса, блиц тизимида 2 та ўйин ўтказишади. Ютган шахматчи ярим финалга чиқади.
Чорак финал жуфтликлари:
Нодирбек Абдусатторов (Ўзбекистон) - Динг Лирен (Хитой)
Винсент Кеймер (Германия) - Левон Арониан (АҚШ)
Фабиано Каруана (АҚШ) - Домараджу Гукеш (Ҳиндистон)
Алиризо Феружа (Франция) - Магнус Карлсен (Норвегия)
