Xabaringiz bor, bugun Osiyo Chempionlar ligasi nimchorak final javob o‘yini doirasida "Navbahor" Saudiya Arabistonining “Al-Ittihod” (Jidda) klubi mehmoni bo‘ladi.

Mazkur uchrashuv oldidan kecha namanganliklar bosh murabbiyi Samvel Babayan bilan birgalikda “Navbahor” sardori Azimjon Ahmedov ham matbuot anjumanida ishtirok etib, jurnalistlarning savollariga javob berdi. Quyida uning fikrlarini e’tiboringizga havola etamiz.

- Assalomu alaykum! Ertaga bizni qiyin bahs kutib turibdi va buni yigitlar yaxshi tushunib turishibdi. Ammo biz bo‘lajak bahsda eng yaxshi o‘yinimizni namoyish etgan holda, O‘zbekiston va Namangan muxlislarini xursand etishga harakat qilamiz.

Qiyin bellashuv bo‘ladi, deganimning sababi, biz ertaga kuchli futbolchilarga qarshi maydonga tushamiz. Lekin bo‘lajak bellashuvga yaxshi tayyorgarlik ko‘rdik va ta’kidlaganimdek, Xudo xohlasa, ertaga eng yaxshi o‘yinimizni namoyish etgan holda, g‘alaba qozonib, keyingi bosqich yo‘llanmasini qo‘lga kiritishga intilamiz.     

Albatta, Karim Benzemaning bo‘lajak bahsda maydonga tushishi bir tomondan maroqli. Boisi, shunday yulduzga qarshi to‘p tepamiz. Namanganda yaxshi o‘yin namoyish etdik. Ertangi uchrashuvda esa undan ikki baravar yaxshiroq o‘ynashga intilamiz. Buni jamoadoshlarim  bilib, tushunib turishibdi. Yana bir marta ta’kidlayman, biz ertaga muxlislarga quvonch ulashish maqsadida maydonga tushamiz, - dedi Azimjon Ahmedov.

“Navbahor” PFK matbuot xizmati.