Qishki seleksiya ishlarini izchillik bilan davom ettirayotgan "Andijon" rejaga binoan kerakli pozisiyalarga kerakli o‘yinchilarni taklif qildi va oxirgi paytlarda hujum chizig‘ini kuchaytirish maqsadida yangi futbolchilar jalb etilayotganidan xabardorsiz. Bunga qadar oldingi chiziq vakillari sifatida Rustam Turdimurodov hamda rossiyalik Luka Zgurskiyning transferlari e’lon qilindi.

Bu hali hammasi emasdi. Jamoa muxlislari uchun yana bir xushxabar shundan iboratki, klub safiga yana bir yangi legioner hujumchi qo‘shildi. Tojikiston milliy terma jamoasi a’zosi hisoblangan Shahram Samiyev bilan rasman shartnoma imzolandi. Kelishuv muddati 3 yilga mo‘ljallangan.

Ma’lumot uchun, Samiyev 2001 yilning 8 fevral kuni tavallud topgan. Uning oxirgi klubi Moldovaning “Milsami” jamoasi hisoblanadi. Shahram faoliyatini Tojikistonda boshlagan. Dastlab “Barkchi”, keyin SSKA (Dushanbe)da o‘ynadi. So‘ngra, 2019 yili “Istiqlol”ga ko‘chib o‘tdi. Shundan so‘ng Shahram Samiyev Rossiyaning “Rubin” klubi a’zosiga aylandi. Tojikistonlik hujumchining keyingi manzili Moldova chempionati bo‘ldi. U yerda “Sherif”, “Dinamo-Avto”, “Zimbru” va “Milsami” sharafini himoya qildi. Bundan tashqari, Belarus chempionatida “Torpedo-Jodino” va “Isloch” klublarida ham to‘p surgan.

Shahram Tojikistonning turli yoshdagi termalarida ham o‘ynagan va hozirda u milliy terma jamoaning muhim futbolchilaridan biri hisoblanadi. Samiyev Tojikiston termasida hozirga qadar 27 ta uchrashuvda 7 ta gol urdi. Yaqinda Qatarda bo‘lib o‘tgan Osiyo Kubogida Samiyev Tojikiston terma jamoasi sharafini himoya qildi.

“Andijon” matbuot xizmati.