24 fevral, shanba kuni Ispaniya Primerasining 26-tur uchrashuvi bo‘lib o‘tdi va unda “Almeriya” va “Atletiko Madrid” klublari to‘qnash kelishdi. O‘yin durang bilan yakunlandi - 2:2.
Uchrashuvdagi hisob o‘yinning ikkinchi daqiqasidayoq ochildi. “Atletiko” hujumchisi Anxel Korrea gol urdi. Mezbonlar 28-daqiqada javob golini kiritishdi. Golga Milandan ijaraga olingan 19 yoshli Luka Romero mualliflik qildi. 57-daqiqada yarim himoyachi Rodrigo De Paul yana “matraschilar”ni oldinga olib chiqdi. 64-daqiqada “Almeriya” yarim himoyachisi Romero dubl qayd etib, hisobni tenglashtirdi.
Ushbu o‘yindan keyin "Atletiko" 52 ochko jamg‘ardi. Diyego Simeone shogirdlari chempionat jadvalida to‘rtinchi o‘rinda bormoqda. "Almeriya" to‘qqizinchi ochkoni qo‘lga kiritdi, ammo baribir oxirgi o‘rinda qolmoqda.
