"Chelsi" himoyachisi Trevo Chaloba "Stemford Bridj"ni tark etishni istamayapti.

Chalobaning kelajagi so‘nggi ikki transfer oynasida noaniq edi, ammo o‘tgan yozda Trevoning o‘zi "Nottingem Forest" tomonidan rad etildi va jarohat yanvar oyida qiziqqan klublarni uzoqlashtirdi va himoyachini mavsumning birinchi yarmini o‘tkazib yuborishga majbur qildi.

"Chelsi" kelasi yozda Chaloba uchun takliflar olishini kutmoqda. London klubi boshliqlari Trevoning sotilishini moliyaviy feyr-pley qoidalariga rioya qilgan holda vaziyatni yaxshilash imkoniyati deb hisoblashmoqda.

Biroq, Chaloba o‘zini "Chelsi"ning boshlang‘ich tarkib futbolchisi bo‘lish uchun yetarli deb hisoblaydi va sakkiz yoshidan beri tizimning bir qismi bo‘lgan klubda o‘z kelajagi uchun kurashishga tayyor, deya ta’kidlaydi TEAMtalk nashri.

"Chelsi" rahbariyati joriy mavsumda atigi uchta o‘yin o‘tkazgan Chalobaning bu pozisiyasidan hayratda, ammo ularning qo‘lidan hech narsa kelmaydi - 24 yoshli angliyalik futbolchining shartnomasi 2028 yilgacha mo‘ljallangan.