OKMK – “Andijon” (0:0) uchrashuvidan keyingi matbuot anjumanining ikkinchi qismida OKMK jamoasi bosh murabbiyi Mirjalol Qosimov qatnashdi.
- Sizlarni ham yangi mavsum boshlangani bilan tabriklayman. O‘yinga keladigan bo‘lsak, qaysidir tomondan bir-biriga munosib, kurashlarga boy o‘yin bo‘ldi. Albatta, har bir jamoa o‘z oldiga g‘alaba qozonish maqsadini qo‘yadi. O‘ylaymanki, haqli ravishda durang bo‘ldi. Har doim bir ishni boshlab olish oson kechmaydi. Mana, boshlab oldik. Keyingi uchrashuvlarga tayyorgarlik ko‘ramiz. Iloji boricha muxlislarimiz uchun chiroyli, mazmunli futbol ko‘rsatishga harakat qilamiz. Shu narsaga erisha olsak, natija ham keladi.
– Rubin Sanchesni qanaqa ahvoldaligi ko‘pchilikni qiziqtiryapti…
– Gadoyev ham, Mirzayev ham bor. Albatta, jamoamizga yetishmayapti. Jarohatlari cho‘zilib ketdi. Shifokorlar ishlashyapti, muolajalarni olib borishmoqda. Bittasidan forig‘ bo‘lgandik, ikkinchisi bo‘ldi. Bu – futbol. Hech kim bu narsadan qochib qutula olmaydi. o‘tgan yili yarim finalda “Navbahor” bilan bo‘lib o‘tgan uchrashuvda jarohat olgandi. Undan avval Gadoyev OCHLda jarohat olgan. Tezroq sog‘ayib, safimizga qo‘shilsa xursand bo‘lamiz. Bundan nafaqat rahbariyat, murabbiylar yoki futbolchilar, balki muxlislar ham xursand bo‘ladilar" - dedi Mirjalol Qosimov.
