Xokkey bo‘yicha Qozog‘iston chempionatida ishtirok etayotgan «Humo» chorak final bosqichida pley-offni yakunladi. Dastlabki 5 ta o‘yindan keyin "Sariarqa" klubi 3:2 hisobida oldinda edi. Shuning uchun Qarag‘anda shahrida o‘tkazilgan bugungi bahsda jamoamizga g‘alaba juda zarur edi.

«Humo» dastlabki ikki bo‘limda bittadan gol urib, 2:0 hisobida oldinga o‘tib oldi. Uchinchi bo‘lim o‘rtalarida mezbonlar bitta javob shaybasini kiritishdi.

Bahs tugashiga 2 daqiqa qolganida esa "Sariarqa" muz maydonida darvozabon o‘rniga oltinchi xokkeychini tushirib, tavakkalga qo‘l urishdi. O‘sha paytda "Humo"da bo‘sh darvozani ishg‘ol qilish uchun ikkita imkoniyat yuzaga keldi. Ammo qozog‘istonlik himoyachi qahramonlik ko‘rsatib, jamoasini muqarrar gollardan qutqarib qoldi.

Bahs tugashiga 52 soniya qolganida esa qozog‘istonliklar hisobni tenglashtirishdi.

Birinchi over-taymning 6-daqiqasida Timur Shingareev "Sariarqa"ga g‘alaba keltiruvchi gol muallifiga aylandi. Bugungi hisob — 3:2. Seriyadagi hisob esa 4:2. "Sariarqa" yarim finalga chiqqan bo‘lsa, "Humo" joriy mavsumdagi ishtirokini yakunladi.

Eslatib o‘tamiz, "Humo" o‘tgan mavsumda finalgacha yetib borib, seriyada "Nomad"ga imkoniyatni boy bergandi.