Хоккей бўйича Қозоғистон чемпионатида иштирок этаётган «Ҳумо» чорак финал босқичида плей-оффни якунлади. Дастлабки 5 та ўйиндан кейин "Сариарқа" клуби 3:2 ҳисобида олдинда эди. Шунинг учун Қарағанда шаҳрида ўтказилган бугунги баҳсда жамоамизга ғалаба жуда зарур эди.

«Ҳумо» дастлабки икки бўлимда биттадан гол уриб, 2:0 ҳисобида олдинга ўтиб олди. Учинчи бўлим ўрталарида мезбонлар битта жавоб шайбасини киритишди.

Баҳс тугашига 2 дақиқа қолганида эса "Сариарқа" муз майдонида дарвозабон ўрнига олтинчи хоккейчини тушириб, таваккалга қўл уришди. Ўша пайтда "Ҳумо"да бўш дарвозани ишғол қилиш учун иккита имконият юзага келди. Аммо қозоғистонлик ҳимоячи қаҳрамонлик кўрсатиб, жамоасини муқаррар голлардан қутқариб қолди.

Баҳс тугашига 52 сония қолганида эса қозоғистонликлар ҳисобни тенглаштиришди.

Биринчи овер-таймнинг 6-дақиқасида Тимур Шингареев "Сариарқа"га ғалаба келтирувчи гол муаллифига айланди. Бугунги ҳисоб — 3:2. Сериядаги ҳисоб эса 4:2. "Сариарқа" ярим финалга чиққан бўлса, "Ҳумо" жорий мавсумдаги иштирокини якунлади.

Эслатиб ўтамиз, "Ҳумо" ўтган мавсумда финалгача етиб бориб, серияда "Номад"га имкониятни бой берганди.