Chexiya poytaxti Praga shahrida shaxmat bo‘yicha "Prague Masters" xalqaro musobaqasida bugun 8-tur o‘yinlari bo‘lib o‘tdi.

Hamyurtimiz Nodirbek Abdusattorov bu turda eronlik Parham Maqsudluga qarshi oq qora donalarda o‘ynadi. Sportchilar bahs boshidan nisbatan ehtiyotkor o‘yin namoyish etishdi. Bu o‘yinning o‘rtalariga borib, boshqa o‘yinlar yakuniga yetib, shu narsa ma’lum bo‘ldiki, agar Nodirbek bugun g‘alaba qozonsa, muddatidan avval g‘oliblikni qo‘lga kiritadi.

Shaxmatchilar shoshmasdan pozision kurashni davom ettirishdi. Faqatgina 28-yurishga kelib Abdusattorov vaziyatni biroz ocha boshladi va tomonlar qarama-qarshi hujumlar bilan jangni davom ettirishdi. 40-yurishda esa Abdusattorov o‘z Farzinini qurbon berdi. Bu paytda vatandoshimizning S yo‘lagidagi piyodasi Farzinga chiqishga 2 qadar qolgandi.

43-yurishda Nodirbek raqib taqdim etgan piyodani urmasdan, katta xatoga yo‘l qo‘ydi. Buning oqibatida Parhamda g‘alaba qozonish imkoniyati yuzaga keldi. Raqibning bosimiga dosh berish uchun uchun Abdusattorovdan juda katta aniqlik talab etilardi. O‘zbek grossmeysteri esa himoyada ishonchli harakat qildi. Buning uchun esa hattoki Ruhni qurbon berishiga to‘g‘ri keldi. Eronlik shaxmatchida Shoh berish imkoniyatiga yakuniga yetgach, Nodirbek o‘sha S yo‘lakdagi piyodasini Farzinga olib chiqish ishlarini boshlab yubordi va 66-yurishda u Farzinga chiqdi. Nodirbek 68-yurishda yana bir ajoyib kombinasiya uyushtirdi. U o‘sha Farzinni qurbon berib, raqibning Farzinini Ot bilan urib olishni reja qilgach, Maqsudli taslim bo‘ldi. Bu paytda taxtada Abdusattorovda Ot va Fil qolgandi. Raqibda esa 4 ta piyoda.

Ushbu g‘alaba tufayli Nodirbek Abdusattorov o‘z ochkolarini 6 taga yetkazdi va muddatidan oldin chempionlikni qo‘lga kiritdi. Turnir tugashiga 1 tur qolganida Maqsudlu, Pragnanandha va Nguyen Tai Dai Van hisobida 4,5 tadan ochko mavjud. Hamyurtimiz ertaga Richard Rapport (Ruminiya)ga qarshi dona suradi.