21 aprel kuni Niderlandiya kubogining final uchrashuvi "Feyenoord" va "NEK Neymegen" o‘rtasida bo‘lib o‘tdi. Uchrashuvga Rotterdamdagi “Feyenoord” stadioni mezbonlik qildi va 1:0 hisobida mezbonlarning g‘alabasi bilan yakunlandi.
Yagona gol muallifi o‘yinning 60-daqiqasida raqib darvozasini ishg‘ol qilgan Igor Payshao bo‘ldi.
Eslatib o‘tamiz, birinchi bo‘limda stadiondagi yong‘in tufayli uchrashuv ma’lum muddatga to‘xtatilgan edi. "Feyenoord" muxlislarining olovli shousidan so‘ng katta bannerlardan biri yonib ketdi. Yong‘in sodir bo‘lgan joyga o‘t o‘chiruvchilar yetib kelgan, butun stadion quyuq tutun bilan qoplangandi. Yarim soatdan keyin o‘yin davom ettirildi.
Shu tariqa, “Feyenoord” Niderlandiya kubogi sohibiga aylandi.
Niderlandiya kubogida eng ko‘p g‘alaba qozonish bo‘yicha rekordchi "Ayaks" bo‘lib, u kubokni 20 marta qo‘lga kiritgan. Bu ko‘rsatkich bo‘yicha ikkinchi o‘rinda "Feyenoord" joylashgan. Uning hisobida mamlakat kubogida 14 ta g‘alaba bor. Kuchli uchlikni PSV (11) yakunlab turibdi.
