21 апрель куни Нидерландия кубогининг финал учрашуви "Фейеноорд" ва "НЕК Неймеген" ўртасида бўлиб ўтди. Учрашувга Роттердамдаги “Фейеноорд” стадиони мезбонлик қилди ва 1:0 ҳисобида мезбонларнинг ғалабаси билан якунланди.
Ягона гол муаллифи ўйиннинг 60-дақиқасида рақиб дарвозасини ишғол қилган Игор Пайшао бўлди.
Эслатиб ўтамиз, биринчи бўлимда стадиондаги ёнғин туфайли учрашув маълум муддатга тўхтатилган эди. "Фейеноорд" мухлисларининг оловли шоусидан сўнг катта баннерлардан бири ёниб кетди. Ёнғин содир бўлган жойга ўт ўчирувчилар етиб келган, бутун стадион қуюқ тутун билан қопланганди. Ярим соатдан кейин ўйин давом эттирилди.
Шу тариқа, “Фейеноорд” Нидерландия кубоги соҳибига айланди.
Нидерландия кубогида энг кўп ғалаба қозониш бўйича рекордчи "Аякс" бўлиб, у кубокни 20 марта қўлга киритган. Бу кўрсаткич бўйича иккинчи ўринда "Фейеноорд" жойлашган. Унинг ҳисобида мамлакат кубогида 14 та ғалаба бор. Кучли учликни ПСВ (11) якунлаб турибди.
