Indoneziya olimpiya terma jamoasi bosh murabbiyi Shin Te-Yong U23 Osiyo kubogi yarim final bosqichi doirasida bo‘lib o‘tadigan O‘zbekistonga qarshi o‘yin oldidan o‘z fikrlari bilan o‘rtoqlashdi.

"Men O‘zbekiston - Saudiya Arabistoni o‘yinini stadiondan kuzatdim. O‘zbekiston juda yaxshi jamoa. Barqaror, yaxshi shakllangan va intizomli. Ularning o‘yinini tomosha qilib, bu jamoa musobaqada nima uchun 12 ta gol urib, nima uchun gol o‘tkazmaganini tushundim. Ularning ustun jihati — hujumga ham, himoyaga ham tez o‘tishida. Bu esa O‘zbekistonni turnirdagi eng yaxshi jamoalardan biriga aylantirdi.

Yarim finalda oson bo‘lmaydi. Ammo biz yaxshi formadamiz. Umid qilaman, ijobiy natijaga erishamiz.

Koreyaga qarshi o‘yindan oldin, agar g‘alaba qozonadigan bo‘lsak, yarim finalda raqibga nisbatan bir kun ko‘proq dam olishimiz bizga ustunlik beradi, deb o‘ylagandik. Ammo Koreyaga qarshi o‘yinimiz 120 daqiqa davom etdi. Shuning uchun jismoniy jihatdan O‘zbekistondan ustun bo‘lamiz, deb ayta olmayman. Ushbu bosqichda ruhiy tayyorgarlik ham muhim rol o‘ynaydi", — dedi koreyalik mutaxassis.