"Inter" hujumchisi Aleksis Sanches klubini almashtirishga tayyorlanayotgan ko‘rinadi.
Bir necha kun avval xabar qilinganidek, chililik forvard muddati tugaydigan shartnomasini uzaytirmoqchi emas. Endi bu ma’lumotni 35 yoshli futbolchining o‘zi ham qisman tasdiqladi.
"Faoliyatimda ko‘plab sovrinlarni qo‘lga kiritdim, ammo "Inter" bilan bu Skudetto alohida yutuq, chunki bu klubga ikkinchi yulduzni keltirdi. Men bu futbolchilarning o‘sib borayotganini ko‘rganman. Hammasi uchun rahmat va omad yigitlar!” – dedi Sanches chempionlik paradidagi muxlislarga murojaatida.
Aleksis Sanches o‘tgan avgust oyida "Inter"ga erkin agent sifatida qaytgan edi. Hujumchi avvalroq 2020 yildan 2022 yilgacha “neradzurrilar” sharafini himoya qilgan.
