«MYU» bosh murabbiyi Erik ten Xag «Bernli»ga qarshi o‘yin oldidan o‘tkazilgan matbuot anjumanida 3ta nashr jurnalistlari bergan savollarga quloq tutishni ham xohlamadi

Aniqrog‘i, Manchester Evening News, The Mirror va The Sun gazetalari xodimlari bilan gaplashishdan bosh tortdi. Ajabo, bu qanaqasi? Shunga o‘xshash holat o‘tgan yilning oxirida ham kuzatilgan edi. Niderlandiyalik mutaxassis o‘shanda («Chelsi» bilan o‘yin oldidan) 4 nafar jurnalistni matbuot anjumaniga kiritmagandi.

Erik ten Xagning yangi taqiqi uncha qattiq emas: Manchester Evening News, The Mirror va The Sun nashrlari vakillari anjumanga kerishlari mumkin, faqat savol berishmasa, bas. Niderlandiyalik mutaxassis yaqindagina jurnalistlarni axloqsizlikda ayblagandi: «Ochig‘i, «Koventri» bilan o‘yinmimizga reaksiyangiz va sharhlaringiz - sharmandalik. Yuqori darajali futbolda natija muhim: mana, «MYU» finalga chiqdi, jamoam bunga faqat oxirgi o‘yini emas, balki avvalgi bos­qichlarda qayd etgan natijalari bilan ham munosib edi». The Telegraph xabariga ko‘ra esa, Erik ten Xag avvalgi chorshanba kuni «Sheffild Yunayted»ga qarshi kechgan o‘yindan keyinoq ba’zi jurnalistlar savollarini e’tiborsiz qoldirgan.

Xo‘sh, «MYU» ustozini nima g‘azablantirmoqda? Gap shundaki, dekabr oyida ten Xag futbolchilar ishonchini yo‘qotganini yozgan jurnalistlar endi klub rahbariyati sabri tugab borayotgani haqida bong urishmoqda.  Mana, oxirgi misollar:

Semyuel Lakxerst (Manchester Evening News): - «Koventri» bilan o‘yinda kuzatilgan voqealardan keyin Erik ten Xagning klubda qolishiga ishonmayman - u hozirning o‘zida ketishi kerak.

Saymon Malok (The Mirror): - Murabbiyga yaqin manbalardan ma’lum bo‘lishicha, agar u ser Jim Retkliffdan kafolat olmasa, mavsum oxirida jamoadan ketadi.

Nil Kastis (The Sun): - Erik ten Xag yozda ishdan bo‘shatiladi, hatto Angliya kubogidagi g‘alaba ham uni iste’fodan qutqarolmaydi.

Insayder Nizar Kinsella ham Erik ten Xag mavsum yakunida «MYU» bilan xayrlashishi muqarrar ekanligi haqida yozmoqda. Ta’kidlanishicha, klubning yangi rahbariyati niderlandiyalik mutaxassisga ortiq imkoniyat bermoqchi emas. Chunonchi, «MYU» boshqaruvini 2022 yili qo‘lga olgan 53 yoshli murabbiy kutilgan natijani ta’minlolmayapti.