"Inter Mayami" bosh direktori Xavyer Asensi Lionel Messining transferi klub daromadiga qanday ta’sir qilganini tushuntirib berdi.

"Leo sizni keyingi bosqichga olib chiqadi. Biroq, hamkorlarga bo‘lgan so‘rovlar darajasi ham o‘sib bormoqda. Biz o‘z pozisiyamizdan juda mamnunmiz, jamoa va qilingan ishlardan faxrlanamiz. Faqat rivojlanish qoladi.

Messining kelishi bilan biz byudjeti 60 millionlik jamoadan 125 yoki 130 millionga o‘tdik. Bu yil aylanmamiz 200 million yoki undan ko‘proq bo‘lishini kutyapman. Vaqtinchalik stadionni hisobga oladigan bo‘lsak, bu juda katta miqdor", - dedi Asensi EFE bilan suhbatda.

Messi 2023 yilning iyulida erkin agent sifatida "PSJ"dan "Inter Mayami"ga o‘tgan edi. Futbolchining klub bilan shartnomasi 2025 yilning dekabrigacha mo‘ljallangan. Transfermarkt argentinalik futbolchini 30 million yevroga baholamoqda.

Joriy mavsumda Messi 10 ta o‘yin o‘tkazib, 11 ta gol urdi va 6 ta golli uzatmani amalga oshirdi.

11 turdan keyin "Inter Mayami" 21 ochko bilan birinchi o‘rinda bormoqda. Ikkinchi o‘rinda "Real Solt-Leyk" (18 ochko) joylashgan.