"Barselona" yozda "Sosyedad"dan Martin Subimendini sotib olmoqchi.
Bir necha bor xabar qilinganidek, maydon markazini kuchaytirish Kataloniya klubining yozgi transfer oynasidagi asosiy vazifalaridan biri hisoblanadi.
Diario Sport xabariga ko‘ra, Subimendi "Barselona"ning asosiy maqsadlaridan biriga aylangan. Bu yagona variant emas, balki asosiy variantdir.
Dushanba kuni "Barsa" sport direktori Deku Subimendining agenti bilan uchrashdi va u yarim himoyachini sotib olishning yagona varianti uning "Sosyedad" bilan shartnomasidagi 60 million yevrolik tovon pulini faollashtirish ekanligini tasdiqladi. Hech qanday chegirmalar bo‘lmaydi. Basklar klubi yaxshi iqtisodiy holatda, shuning uchun shoshilinch sotuvga ehtiyoj yo‘q.
Shuni hisobga olsak, bugungi kunda Subimendi transferi "Barselona" uchun faqat orzu bo‘lib qolmoqda. Bunday yirik sarmoyadan oldin kataloniyaliklar bir qancha to‘siqlarni yengib o‘tishlari kerak bo‘ladi.
Joriy mavsumda 25 yoshli yarim himoyachi “Sosyedad” safida barcha turnirlar doirasida 45 ta o‘yinda maydonga tushib, 4 ta gol urdi.
