Xabaringiz bor, Bishkek shahrida o‘tgan Osiyo qit’asi sportchilari uchun Parij-2024 Olimpiadasiga lisenziya beruvchi turnirda Bekzod Abdurahmonov o‘zining uchinchi Olimpiya o‘yinlari yo‘llanmasini qo‘lga kiritgandi.
74 kg vazn toifasida yurtimiz sharafini himoya qilgan Tokio Olimpiadasining bronza medali sovrindori 1/2 finalda qirg‘izistonlik Orozobek Toktomambetovni 6-0 hisobida mag‘lubiyatga uchratgan va terma jamoamizga navbatdagi lisenziyani taqdim etgandi. Bu Abdurahmonov uchun uchinchi Olimpiada bo‘lishi kerak.
Ammo shoshilishga biroz erta ekani kecha tarqalgan xabarlarda ayon bo‘ldi. Gap shundaki, Bekzod Abdurahmonov Parij-2024 Olimpiadasiga bormasligi, uning o‘rnini mahalliylashtirilgan rossiyalik "legioner" Razambek Jamalov egallashi mumkin. Sport kurashlarida ham qoida bo‘yicha xuddi og‘ir atletikaga o‘xshab lisenziya jamoaga beriladi. Murabbiylar shtabi xohlasa, Abdurahmonovning lisenziyasini qoldirishi ham mumkin.
O‘zbekiston fuqaroligi berilgan Jamalov hozirda o‘zining yaxshi sport formasiga kirib olgan. Bekzod ham yomon sport formada emas, aks holda Olimpiada lisenziyasini yutib olmasdi. Xasavyurtlik Jamalov ikki karra (2020, 2022) Rossiya chempioni hisoblanadi. Rossiya chempionatining finalida Olimpiada chempioni Zaurbek Sidakov bilan tengma-teng kurashgan. Iste’dodiga shubha yo‘q, lekin so‘nggi yillarda jarohatlar iskanjasiga tushib qoldi va buning natijasida juda ko‘p musobaqalarda ishtirok eta olmadi.
Xullas, O‘zbekiston sport kurashlari tarixida ilk bor Olimpiadaga boradigan kurashchini shu yo‘l bilan aniqlaymiz. Ushbu mini turnir 6-9 iyun kunlari Vengriya poytaxti Budapesht shahrida bo‘lib o‘tadi. Unda eng yaxshi natija qayd etgan kurashchi 74 kg vazn toifasida O‘zbekiston nomidan Parij-2024 Olimpiadasiga boradi. U Bekzod Abdurahmonov bo‘ladimi yoki Razambek Jamalov, buni tez orada bilib olamiz.
Murabbiylar shtabi yoki boshqa shaxslarning shu yo‘l bilan eng yaxshi kurashchini aniqlashi qanchalik to‘g‘ri qaror bo‘lganini Parij Olimpiadasida bilib olamiz.
