Poytaxtimiz mezbonlik qilayotgan Butunjahon antidoping agentligi (WADA)ning Osiyo va Okeaniya mamlakatlari sport vazirliklarining 19-hukumatlararo yig‘ilishi doirasida mamlakatimiz rasmiylari va WADA rahbariyati o‘rtasida uchrashuv tashkil etildi.
Unda dopingga qarshi kurash bo‘yicha o‘zaro hamkorlikka oid qator masalalar muhokama qilindi.
Uchrashuvda O‘zbekiston Respublikasi Prezidenti Administrasiyasi departamenti rahbari Odil Abduraxmanov, Vitold Banka boshchiligidagi WADA mutasaddilari, Sport vaziri Adham Ikramov, MOQ Bosh kotibi Oybek Kasimov, O‘zbekiston Milliy antidoping agentligi direktori Abdushukur Sadikov ishtirok etishdi.
Odil Abduraxmanov Prezidentimiz Shavkat Mirziyoyev barpo etayotgan Yangi O‘zbekistonning imkoniyatlarini sport orqali jahon maydonida namoyish etish, jismoniy tarbiya va sportni qo‘llab-quvvatlash yo‘lida olib borayotgan ishlari xususida batafsil ma’lumot berdi.
O‘z navbatida Adham Ikramov va Oybek Kasimov atletlarimizning Parij-2024 yozgi Olimpiya o‘yinlariga olib borayotgan tayyorgarliklari, davlatimiz tomonidan yaratib berilayotgan sharoitlar xususida to‘xtalishdi.
Qayd etish joiz, yurtimiz bunday nufuzdagi yig‘ilishni birinchi marotaba qabul qilmoqda va WADA Prezidenti ham ilk bora diyorimizga tashrif buyurmoqda. Vitold Banka o‘zbekistonlik sportchilarning xalqaro maydondagi natijalari ortishi barobarida mazkur soha mutaxassislari ham o‘z tajribalarini orttirib borayotganliklari, hamyurtlarimiz ulkan muvaffaqiyatlarga erishayotganini maqtov bilan tilga oldi.
Samimiy ruhda o‘tgan uchrashuv davomida tomonlar o‘zbekistonlik xalqaro doping ofiserlarini yanada ko‘paytirish, malakali kadrlar tayyorlash va kelgusida bu kabi ko‘plab xalqaro tadbirlarni o‘tkazish bo‘yicha fikr almashishdi.
