Shohruh Davlatov va Yekaterina Tunguskovaga BYD mashinalari taqdim etildi.
Joriy yilning 21-aprel kuni poytaxtimiz mezbonlik qilgan Toshkent VI xalqaro marafonida hamyurtlarimiz Shohruh Davlatov va Yekaterina Tunguskova bosh sovrin – BYD mashinasini yutib olishgan edi. Bugun Toshkentda o‘tayotgan yengil atletika bo‘yicha O‘zbekiston ochiq chempionatida har ikki sportchiga sovrinlari tantanali ravishda topshirildi.
Taqdirlash marosimida MOQ Bosh kotibi Oybek Kasimov, mamlakat yengil atletika federasiyasi rahbariyati va sportchilar ishtirok etishdi. Unda so‘z olgan Oybek Omilovich atletlarimizni qo‘lga kiritilgan muvaffaqiyat bilan qutlab, ularning kelgusi faoliyatida ham omad tiladi.