«Al-Ahli» hujumkor yarim himoyachisi Vanderson Galeno Saudiya Arabistoni chempionati tashkilotchilarini yon bosishda va adolatsizlikda aybladi.

«Sovrinni hoziroq bitta odamga topshirib qo‘ya qolishsa ham bo‘ladi. Ular bizni har qanday yo‘l bilan chempionlik uchun kurashdan chiqarib yubormoqchi. Bu — ular intilayotgan narsa. Bu jamoamizga nisbatan hurmatsizlikdir», — deyiladi futbolchining ijtimoiy tarmoqlarda qoldirgan xabarida.

Eslatib o‘tamiz, mamlakat chempionatining so‘nggi bahsida «Al-Ahli» «Al-Fayha» bilan 1:1 hisobida durang o‘ynadi.

Turnir jadvalida Krishtianu Ronaldu to‘p suradigan «An-Nasr» klubi peshqadamlik qilmoqda. «Al-Ahli» esa birinchi o‘rindan uch ochko orqada qolmoqda.