Madridning «Real» jamoasi bosh murabbiyi Alvaro Arbeloa hamda himoyachi Raul Asensio o‘rtasida mojaro yuz berdi.

Bu holat futbolchi 11 mart kuni bo‘lib o‘tgan Chempionlar ligasi 1/8 finalida «Manchester Siti»ga qarshi ilk uchrashuvda (3:0) asosiy tarkibga kiritilmaganini bilganidan so‘ng yuzaga kelgan. Asensio o‘zini asosiy tarkibda o‘ynashga munosib deb hisoblagan, chunki o‘tgan mavsumda «shaharliklar»ga qarshi o‘yinlarda yaxshi ishtirok etgan. Bu haqda AS xabar bermoqda.

Manbaga ko‘ra, Asensio shaxsan Arbeloaga o‘z noroziligini bildirgan va murabbiy buni intizomsizlik sifatida baholagan. Suhbat davomida 23 yoshli himoyachi bir necha bor boshqa futbolchilar yo‘qligi sabab jarohat bilan ham maydonga tushganini ta’kidlagan.

Qayd etilishicha, keyinchalik Asensio «Real» murabbiyidan uzr so‘ragan, ammo bu unga ko‘proq o‘yin amaliyoti berilishiga olib kelmagan. Hozircha «qaymoqranglilar» tarbiyalanuvchisining klubdagi kelajagi noaniq bo‘lib qolmoqda.