Мадриднинг «Реал» жамоаси бош мураббийи Альваро Арбелоа ҳамда ҳимоячи Рауль Асенсио ўртасида можаро юз берди.
Бу ҳолат футболчи 11 март куни бўлиб ўтган Чемпионлар лигаси 1/8 финалида «Манчестер Сити»га қарши илк учрашувда (3:0) асосий таркибга киритилмаганини билганидан сўнг юзага келган. Асенсио ўзини асосий таркибда ўйнашга муносиб деб ҳисоблаган, чунки ўтган мавсумда «шаҳарликлар»га қарши ўйинларда яхши иштирок этган. Бу ҳақда AS хабар бермоқда.
Манбага кўра, Асенсио шахсан Арбелоага ўз норозилигини билдирган ва мураббий буни интизомсизлик сифатида баҳолаган. Суҳбат давомида 23 ёшли ҳимоячи бир неча бор бошқа футболчилар йўқлиги сабаб жароҳат билан ҳам майдонга тушганини таъкидлаган.
Қайд этилишича, кейинчалик Асенсио «Реал» мураббийидан узр сўраган, аммо бу унга кўпроқ ўйин амалиёти берилишига олиб келмаган. Ҳозирча «қаймоқранглилар» тарбияланувчисининг клубдаги келажаги ноаниқ бўлиб қолмоқда.













