"Barselona" "Valensiya" futbolchisi Xavi Gerraga qiziqish bildirmoqda.

Marca nashri xabariga ko‘ra, "ko‘k-anorranglilar" sport rahbariyati Gaviga o‘xshash o‘yinchi - jismonan va himoyaviy mahoratga e’tibor qaratadigan yarim himoyachi qidirmoqda. Yangi bosh murabbiy Xansi Flik ko‘p o‘yinlarni ikki tayanch yarim himoyachi bilan o‘tkazish niyatida.

Gavining jarohatidan tiklanishi biroz vaqt talab etadi va tuzalish rejalashtirilganidek ketayotgan bo‘lsa-da, bunday og‘ir jarohatdan so‘ng futbolchining avvalgi darajasiga qaytishi uchun bir necha oy kerak bo‘ladi.

Shu sababli, "Barselona"ning yozgi transfer oynasidagi ustuvor maqsadlaridan biri "Valensiya" yarim himoyachisi Xavi Gerra hisoblanadi. "Barselona" rahbariyati futbolchini jamoa ehtiyojlarini qondirayapti deb hisoblamoqda. Kataloniyaliklar 21 yoshli ispaniyalik futbolchini uzoq vaqtdan beri kuzatib kelishmoqda va u kelasi mavsumda jamoani mustahkamlovchilaridan biriga aylanishi mumkinligiga ishonishmoqda.

Futbolchining narxi 20-25 million yevro atrofida. Muammo "Barselona"ning og‘ir moliyaviy ahvoli bo‘lishi mumkin, bu esa hozirda klubga transfer bitimlarini amalga oshirishga to‘sqinlik qilmoqda. Biroq Gerra klub bu yoz uchun kurashadigan futbolchi.

Yarim himoyachiga o‘tgan qishda "Napoli" qiziqish bildirgandi. Italiya klubi futbolchini kuzatishda davom etmoqda.

O‘tgan mavsumda Gerra La Ligada 36 ta o‘yin o‘tkazib, 4 ta gol urdi va 1 ta golli uzatmani amalga oshirdi.