Erling Xoland Norvegiya terma jamoasi uchun gol urish bo‘yicha rekordga yaqinlashdi.

«Manchester Siti» hujumchisi Kosovo termasi bilan o‘rtoqlik uchrashuvining 15-daqiqasidayoq hisobni ochdi. Hozirda Xoland Norvegiya terma jamoasi safida 32 ta o‘yinda 28 ta gol urgan.

23 yoshli forvardga jamoa tarixidagi eng yaxshi to‘purar bo‘lishiga 5 ta gol yetishmayapti. Hozirda Norvegiya termasi uchun gol urish bo‘yicha rekord Yergen Yuvega tegishli bo‘lib, u 1928 yildan 1937 yilgacha jamoada o‘ynagan - u terma jamoa safida 45 o‘yinda 33 ta gol urgan.