Murabbiyning iste’fosi turlicha sabablar bilan ro‘y beradi. Murabbiy rahbariyat yoki futbolchilar bilan ziddiyatga borishi, ma’lum vaziyatni o‘nglash uchun yetarli salohiyatga ega emasligi oydinlashishi mumkin.

Bunday holatlarda murabbiy iste’foga chiqariladi va uning o‘rniga yangi nomzod axtariladi. Bu yerda eski murabbiyni iste’foga chiqarish va yangi murabbiyni tayinlash - bir biriga bog‘liq bo‘lmagan alohida qarorlar.

Ularning ikkisi ham to‘g‘ri, noto‘g‘ri yoki biri to‘g‘ri, ikkinchisi noto‘g‘ri bo‘lishi mumkin. Masalan, “Barselona” Xavini iste’foga chiqardi – bu qaror to‘g‘ri yoki noto‘g‘ri, bahslashish mumkin. Xavining o‘rniga Flik keldi – bu ham alohida qaror, buniyam tahlil qilish mumkin.

Qizig‘i, Erik ten Xagning holatida, vaziyat tamomila boshqacha. INEOS Erikning iste’fosini kechiktirish bilan shunday vaziyat hosil qildi-ki, endi iste’foning mazmuni yangi murabbiy kim bo‘lishi bilan butunlay boshqacha ma’no kasb etadi. Endi “natijalar uchun Erikni bo‘shatish” emas, “uning o‘rniga falonchini olib kelish”, degan ifoda vaziyatni yaxshiroq baholaydi. Shuning uchun ham Erikning iste’fosi haqida so‘z borganda, klub muxlislari ham “o‘rniga kim kelishiga qarab” qo‘llashi yoki qarshi chiqishi mumkin. Aytaylik, Erikning o‘rniga Tuxelning kelishi biroz iliq qabul qilinsa, ko‘proq tilga olingan yana bir murabbiy Garet Sautgeyt varianti qo‘rqinchli tushdek yangrayotgandi.

Xullas, kam kuzatiladigan holat ro‘y berdi – “MYU”ning yangi mavsumda boshqarishi mumkin bo‘lgan murabbiylar poygasida xuddi yana bir nomzod singari Erik ten Xag ham qatnashdi. Chamamda, rahbariyat bir qator nomzodlarni ko‘rib chiqib, hatto ba’zilari bilan muzokaralar ham o‘tkazib, yakunda niderlandiyalik murabbiyga yana imkoniyat berish lozim, degan qarorga kelingan. Rostan ham bu qarorning salmog‘i og‘irroq bo‘lishi mumkin.

Erikning so‘nggi uch haftadagi kamsitilishlarga chidab, masalan Tuxelga o‘xshab o‘zi ketib qolmaganining sababi esa, balkim, murabbiyning aynan “MYU”da muvaffaqiyat qozonishiga bo‘lgan ishonchi va rostan ham yaxshiroq tarkib bilan ko‘p tanqidchilarning adashganini ko‘rsatib qo‘yishni qattiq istayotganidan bo‘lishi mumkin. Ko‘ramiz, omad.