Belarusning "Energetik-BGU" klubi bosh murabbiyi Aleksey Merkulov o‘zining sobiq shogirdi Abduqodir Husanov haqida fikr bildirdi. Hozirgi vaqtda o‘zbek himoyachisi Husanov Fransiyaning "Lans" klubi sharafini himoya qilmoqda va Angliyaning "Manchester Siti" jamoasiga o‘tishiga yaqin.

"Abduqodir 2022 yil boshida "Energetik" jamoasiga kelib qo‘shildi. Gap shundaki, "Energetik" futbol klubi — Anatoliy Ivanovich Yuryevichning mahsuli. U jamoa uchun maxsus dastur va o‘ziga xos falsafa yaratgan. Shu tizimga tayangan holda asosiy jamoa bilan taxminan yetti nafar murabbiydan iborat shtab ishlaydi. Husanovni aynan Anatoliy Ivanovich o‘zining sobiq ittifoq hududidagi keng aloqalari orqali topib keltirdi.

Abduqodir "Energetik"ka kelganida O‘zbekistonda yarim himoyachi sifatida o‘ynagan edi. 17 yoshli yigitni ko‘riboq, uning pozisiyasini markaziy himoyachi sifatida o‘zgartirdik. 2022 yilda "Energetik" Belarusda sensasiya qildi va mamlakat chempionatida ikkinchi o‘rinni egalladi. Bu yutuqda Husanovning hissasi katta bo‘ldi.

O‘sha vaqtda Abduqodir haliishlom berilmagan olmosga o‘xshardi. Uning iste’dodi borligi ko‘rinib turardi, ammo unga, avvalo, jismoniy sifatlar va taktik tayyorgarlik bazasi zarur edi. Bizning butun murabbiylar shtabi aynan shu jihatlarda ishladi. Shuni aytish kerakki, "Energetik"da o‘yinchilar haqida ob’ektiv ma’lumotlar olish imkonini beradigan ilmiy asos juda yaxshi rivojlangan.  

Husanov — bu shunday futbolchiki, murabbiylar: "Eh, ana shunday o‘yinchilar ko‘proq bo‘lsa..." deyishadi. Tarbiyali va ziyoli yigit. U bilan suhbatlashish yoqimli. Juda yuqori intellektga va o‘rganish qobiliyatiga ega. Maydonda Abduqodir juda tez, yakkakurashlarda ajoyib, yaxshi zarbaga ega, o‘z yoshiga nisbatan haddan tashqari sokin va ruhiy barqaror", — dedi Merkulov "Chempionat" muxbiri Vladimir Chetverikka bergan intervyusida.