Беларуснинг "Энергетик-БГУ" клуби бош мураббийи Алексей Меркулов ўзининг собиқ шогирди Абдуқодир Ҳусанов ҳақида фикр билдирди. Ҳозирги вақтда ўзбек ҳимоячиси Ҳусанов Франциянинг "Ланс" клуби шарафини ҳимоя қилмоқда ва Англиянинг "Манчестер Сити" жамоасига ўтишига яқин.

"Абдуқодир 2022 йил бошида "Энергетик" жамоасига келиб қўшилди. Гап шундаки, "Энергетик" футбол клуби — Анатолий Иванович Юрьевичнинг маҳсули. У жамоа учун махсус дастур ва ўзига хос фалсафа яратган. Шу тизимга таянган ҳолда асосий жамоа билан тахминан етти нафар мураббийдан иборат штаб ишлайди. Ҳусановни айнан Анатолий Иванович ўзининг собиқ иттифоқ ҳудудидаги кенг алоқалари орқали топиб келтирди.

Абдуқодир "Энергетик"ка келганида Ўзбекистонда ярим ҳимоячи сифатида ўйнаган эди. 17 ёшли йигитни кўрибоқ, унинг позициясини марказий ҳимоячи сифатида ўзгартирдик. 2022 йилда "Энергетик" Беларусда сенсация қилди ва мамлакат чемпионатида иккинчи ўринни эгаллади. Бу ютуқда Ҳусановнинг ҳиссаси катта бўлди.

Ўша вақтда Абдуқодир ҳалиишлом берилмаган олмосга ўхшарди. Унинг истеъдоди борлиги кўриниб турарди, аммо унга, аввало, жисмоний сифатлар ва тактик тайёргарлик базаси зарур эди. Бизнинг бутун мураббийлар штаби айнан шу жиҳатларда ишлади. Шуни айтиш керакки, "Энергетик"да ўйинчилар ҳақида объектив маълумотлар олиш имконини берадиган илмий асос жуда яхши ривожланган.  

Ҳусанов — бу шундай футболчики, мураббийлар: "Эҳ, ана шундай ўйинчилар кўпроқ бўлса..." дейишади. Тарбияли ва зиёли йигит. У билан суҳбатлашиш ёқимли. Жуда юқори интеллектга ва ўрганиш қобилиятига эга. Майдонда Абдуқодир жуда тез, яккакурашларда ажойиб, яхши зарбага эга, ўз ёшига нисбатан ҳаддан ташқари сокин ва руҳий барқарор", — деди Меркулов "Чемпионат" мухбири Владимир Четверикка берган интервьюсида.