O‘zbekiston terma jamoasi hamda “Lans” klubi himoyachisi Abduqodir Husanov “Manchester Siti” klubiga o‘tishi aniq bo‘lib ulgurdi. Transfer uchun to‘lanadigan 40 million yevro uni Osiyodagi top jamoa futbolchilarining umumiy narxidan ham qimmatroq futbolchiga aylantiradi.
Turli ishonchli manbalar klub mutasaddilari va futbolchi o‘rtasida kelishuv amalga oshgani, yaqin kunlar ichida Abduqodir “Manchester Siti” klubida tibbiy ko‘rikdan o‘tishi haqida xabar bermoqda.
Futbolchi va klub 2029 yilning yoziga qadar shartnoma imzolaydi. Kelishuvga ko‘ra, “shaharliklar” 40 million yevro to‘lab beradi. Transfermarkt ma’lumotlariga ko‘ra, ushbu qiymat bir nechta Osiyoning top jamoalaridagi futbolchilarning umumiy narxidan ham qimmatroq.
Hozirda futbolchilarning narxlari orqali tuzilgan eng qimmat Osiyo jamoalari reytingida Yaponiya (280 million yevro), Janubiy Koreya (158 mln yevro) va Eron (48 mln yevro) yetakchilik qilmoqda. O‘zbekiston terma jamoasi 47 millionga baholangan. Agar transfer rasman amalga oshsa, O‘zbekiston jamoasi Erondan o‘zib ketadi va qiymati 70 million yevrodan oshib, Osiyoning 3-jamoasiga aylanadi.
Qiziqarlisi, Abduqodirning narxi Osiyoning bir nechta top jamoalari narxlaridan qimmat. Masalan, Avstraliya (39 million yevro), BAA (35,95 mln), Qatar (18,98 mln) va Saudiya Arabistonining to‘liq tarkibi ham O‘zbekiston terma jamoasi himoyachisining narxidan arzonroqqa baholangan. O‘zbekiston jamoasining to‘liq tarkibi ham Abduqodirsiz 35 millionga teng.
Abduqodir Husanov o‘zbek futbolchilari orasida ham eng qimmat futbolchiga aylanadi. Bundan avvalgi rekord summa Eldor Shomurodovga tegishli bo‘lib, u “Roma”ga 17,5 million yevro evaziga o‘tgandi.
Ma’lumot uchun, o‘zbekistonlik yosh himoyachiga turli top klublar qiziqish bildirdi. Ular orasida Fransiya chempioni “PSJ”, Angliyaning “Chelsi”, “Nyukasl”, Ispaniya grandi “Real” klublari bor edi. Yakunda Gvardiola boshchiligidagi jamoa himoya chizig‘ini O‘zbekiston milliy jamoasi himoyachisi bilan to‘ldirishga qaror qildi. Shu tariqa, Abduqodir Husanov APLda o‘ynaydigan birinchi o‘zbekistonlikka aylanadi.
