"Inter" yarim himoyachisi Xoqon Chalxano‘g‘lu "Bavariya"ning qiziqishi haqidagi mish-mishlar ortidan ijtimoiy tarmoqlarda o‘zining hozirgi jamoasida baxtli ekanligini ta’kidlagan bayonotini e’lon qildi.

Avvalroq OAVda turkiyalik 30 yoshli futbolchi Myunxen klubi bilan muzokara olib borayotgani haqida ma’lumotlar paydo bo‘lgan va bu "neradzurrilar" rahbariyatining noroziligiga sabab bo‘lgandi.

"Ommaviy axborot vositalaridagi so‘nggi mish-mishlarni hisobga olib, men vaziyat haqida to‘g‘ridan-to‘g‘ri gapirmoqchiman. Shu paytgacha mish-mishlarga izoh berishdan o‘zimni tiyganman, chunki Turkiya terma jamoasi sardori sifatida bor e’tiborimni Yevro-2024ga qaratganman. Biroq, keyingi tushunmovchiliklarga yo‘l qo‘ymaslik uchun ayni paytda aniq bayonot berishni o‘rinli deb bilaman.

"Inter"da juda xursandman. Klub va bizning ajoyib muxlislarimiz bilan munosabatlarim haqiqatan ham alohida. Biz birgalikda katta muvaffaqiyatlarga erishdik va kelajakda "Inter" bilan yanada ko‘proq sovrinlarni qo‘lga kiritish umididan xursandman.

Yana bir bor aytaman, men endi butun e’tiborimni o‘z mamlakatimdagi odamlarni baxtli qilishga qaratganman. Tushunganingiz va qo‘llab-quvvatlaganingiz uchun tashakkur" - dedi Chalxano‘g‘lu.