"Интер" ярим ҳимоячиси Хоқон Чалханўғлу "Бавария"нинг қизиқиши ҳақидаги миш-мишлар ортидан ижтимоий тармоқларда ўзининг ҳозирги жамоасида бахтли эканлигини таъкидлаган баёнотини эълон қилди.

Аввалроқ ОАВда туркиялик 30 ёшли футболчи Мюнхен клуби билан музокара олиб бораётгани ҳақида маълумотлар пайдо бўлган ва бу "нерадзуррилар" раҳбариятининг норозилигига сабаб бўлганди.

"Оммавий ахборот воситаларидаги сўнгги миш-мишларни ҳисобга олиб, мен вазият ҳақида тўғридан-тўғри гапирмоқчиман. Шу пайтгача миш-мишларга изоҳ беришдан ўзимни тийганман, чунки Туркия терма жамоаси сардори сифатида бор эътиборимни Евро-2024га қаратганман. Бироқ, кейинги тушунмовчиликларга йўл қўймаслик учун айни пайтда аниқ баёнот беришни ўринли деб биламан.

"Интер"да жуда хурсандман. Клуб ва бизнинг ажойиб мухлисларимиз билан муносабатларим ҳақиқатан ҳам алоҳида. Биз биргаликда катта муваффақиятларга эришдик ва келажакда "Интер" билан янада кўпроқ совринларни қўлга киритиш умидидан хурсандман.

Яна бир бор айтаман, мен энди бутун эътиборимни ўз мамлакатимдаги одамларни бахтли қилишга қаратганман. Тушунганингиз ва қўллаб-қувватлаганингиз учун ташаккур" - деди Чалханўғлу.