Turkiya futbol federasiyasi prezidenti Mehmet Buyukekshi ijtimoiy tarmoqlarda Turkiya terma jamoasi atrofida yuzaga kelgan mojaroga izoh berdi.

Avvalroq internetda turkiyalik murabbiylar shtabi Arda Gyulerni jamoadan alohida mashg‘ulot o‘tkazishga majburlayotgani aks etgan video paydo bo‘lgandi. Keyinchalik ma’lum bo‘lishicha, bu murabbiylar shtabi tomonidan jazo emas, balki Gyulerning yengil jarohati tufayli zarur chora bo‘lgan.

"Hech kim terma jamoamizdan shaxsiy manfaat uchun foydalana olmaydi. Guruhdan chiqishimiz uchun Chexiya bilan o‘yinda ham bitta ochko yetarli bo‘lardi. Ammo, afsuski, ijtimoiy tarmoqlardagi videolar orqali iflos, noto‘g‘ri ma’lumotlar paydo bo‘ladi.

Tarix davomida futbolimizga jamoamiz muvaffaqiyati shaxsiy umidlarini oqlashini istamaydigan kimsalarning shaxsiy manfaatlari tahdid qilib kelgan. O‘tmishdagidek bugun ham milliy qadriyatlardan bebahra odamlar yana maydonga chiqdi. Ular jamoamizning guruhdan chiqishini istamaydi, bu esa xalqimizga ta’sir qiladi.

Davlat bayrog‘i tushirilgan forma kiygan o‘g‘lonlarimiz o‘z muvaffaqiyatlari bilan bizdan bo‘lmaganlarni yana bir karra xafsalasi pir bo‘lishiga chin dildan ishonamiz. Biz jamoamizning barcha futbolchilari va texnik xodimlariga doim ishonganmiz va ishonishda davom etamiz", - deya Buyukekshining so‘zlarini keltiradi TFF matbuot xizmati.