Superliganing 13-turidan o‘rin olgan "Metallurg" — "Nasaf" (0:0) uchrashuvidan so‘ng mezbonlar bosh murabbiyi Ilyos Qurbonov matbuot anjumanida ishtirok etdi.

O‘yin haqida
— Yigitlarga minnatdorchilik bildiraman, ular bugun maydonda borlarini berishdi. Raqibni yaxshi o‘rganib ham chiqqandik. O‘zbekistondagi eng kuchli jamoalardan biri. Qarshi hujumda o‘ynashni maqsad qilgandik. Vaziyatlarimiz bo‘ldi, foydalana olmadik. Yomon o‘yin bo‘lmadi deb o‘ylayman.

— "Nasaf" bilan o‘yin oldidan berilgan ko‘rsatmalarni jamoa futbolchilari qanchalik amalga oshira olishdi?
— Aytib o‘tganimdek, yigitlar berilgan ko‘rsatmalarni yaxshi bajarishdi. Zich o‘ynab, qarshi hujumlardan foydalanishni maqsad qilgandik. Vaziyatlarimiz bo‘ldi. O‘tgan o‘yinda ham shu kabi uslubda o‘ynagandik. "Nasaf" bilan o‘yinda ochiq futbol o‘ynash qiyin edi.

— So‘ngi daqiqalarda "Nasaf" katta kuch bilan oldinga chiqqani hisobiga jamoangiz qarshi hujumlarida vaziyatlar bo‘ldi. Mana shu vaziyatlardan foydalanishga nima yetishmadi deb o‘ylaysiz?
— Mashg‘ulotlarda qarshi hujumlarda ishlagandik. Bunday uslubda birinchi uzatmaning ahamiyati juda yuqori bo‘ladi. Bizga mukammal uzatma bera oladigan ijrochi yetishmadi. O‘zaro tushunmovchilik yuzaga keldi.

— Zabihillo O‘rinboyev qachon safga qaytadi?
— Zabihillo shu haftaning oxirida so‘ngi ko‘rikdan o‘tadi va umumiy guruh bilan mashg‘ulotlarga qaytadi. Ikkinchi davra boshidanoq safimizga qaytishidan umid qilayapmiz.