Belgiya terma jamoasi muxlislari Ukraina bilan durangdan (0:0) so‘ng o‘z jamoasiga nisbatan xushtakbozlik qilishdi. Shubhasiz, o‘yinchilarning yakunda vaqtni cho‘zishlari muxlislarga yoqmadi. O‘yindan so‘ng Kevin de Bryuyne hatto hushtak tufayli jamoani maydondan olib chiqib ketishga qaror qildi. "Qizil iblislar" bosh murabbiyi Domeniko Tedesko hushtakbozlik haqida fikr bildirdi.
"Albatta, biz hushtakboshlikdan biroz hayratdamiz. Biz pley-offga chiqmoqchi edik va bunga erishdik. Ukraina bilan haqiqatdan ham qiyin o‘yin bo‘ldi, biz g‘alaba qozonishni xohlagandik. Agar muxlislar hushtak chalishsa, biz buni qabul qilishga majbur bo‘lamiz", - dedi Tedesko jurnalistlarga.
Yevropa chempionati 1/8 finalida Belgiya terma jamoasi Fransiyaga qarshi maydonga tushadi.
