Xitoylik badmintonchi Chjan Chjisze Indoneziyada bo‘lib o‘tayotgan o‘smirlar o‘rtasidagi Osiyo chempionatida o‘yin vaqtida yuragi xuruj qilib, 17 yoshida vafot etdi, deb yozadi AP.
Yakshanba kuni yaponiyalik raqibiga qarshi o‘yinda sportchi hushini yo‘qotib, talvasaga tusha boshlagan.
Unga joyida tibbiy yordam ko‘rsatilgan, shundan so‘ng tez yordam mashinasida eng yaqin shifoxonaga yetkazilgan, so‘ngra Yogyakarta provinsiyasidagi bosh kasalxonaga o‘tkazilgan, biroq uni qutqarib bo‘lmagan.
Indoneziya badminton assosiasiyasi sportchining to‘satdan yuragi xuruj qilib qolganini aytdi.
Chjisze badminton o‘ynashni bolalar bog‘chasida boshlagan va o‘tgan yili Xitoy terma jamoasi tarkibiga kiritilgandi.
Shu yilning boshida u Niderlandiyada o‘smirlar o‘rtasidagi nufuzli turnirda g‘olib chiqdi.
