Хитойлик бадминтончи Чжан Чжицзе Индонезияда бўлиб ўтаётган ўсмирлар ўртасидаги Осиё чемпионатида ўйин вақтида юраги хуруж қилиб, 17 ёшида вафот этди, деб ёзади AP.

Якшанба куни япониялик рақибига қарши ўйинда спортчи ҳушини йўқотиб, талвасага туша бошлаган.

Унга жойида тиббий ёрдам кўрсатилган, шундан сўнг тез ёрдам машинасида энг яқин шифохонага етказилган, сўнгра Йогякарта провинциясидаги бош касалхонага ўтказилган, бироқ уни қутқариб бўлмаган.

Индонезия бадминтон ассоциацияси спортчининг тўсатдан юраги хуруж қилиб қолганини айтди.

Чжицзе бадминтон ўйнашни болалар боғчасида бошлаган ва ўтган йили Хитой терма жамоаси таркибига киритилганди.

Шу йилнинг бошида у Нидерландияда ўсмирлар ўртасидаги нуфузли турнирда ғолиб чиқди.