Мадриднинг «Реал» клуби янги бош мураббийи Жозе Моуриньо Эндрикни порлоқ келажак кутаётганига ишонади. Португалиялик мутахассис ёш ҳужумчи билан иш бошлашни интиқлик билан кутмоқда, деб хабар беради инсайдер Фабрицио Романо.

«The Special One» бразилиялик футболчининг асосий таркибдан мустаҳкам жой эгаллашга ва вақт ўтиши билан унинг қўл остида «Реал»нинг асосий фигураларидан бирига айланишга қодир, деб ҳисоблайди. Шу билан бирга, манбанинг қайд этишича, мураббий футболчидан ҳам ҳужум марказида, ҳам вингер позициясида фойдаланишни режалаштирмоқда.

Эслатиб ўтамиз, Эндрик ортда қолган мавсумнинг иккинчи ярмини Франциянинг «Лион» клубида ижарада ўтказди ва у ерда 21 та учрашувда майдонга тушиб, 8 та гол урди ҳамда 8 та голли узатмани амалга оширди.