"Bavariya" sport kengashi a’zosi Maks Eberl "Kristal Pelas"dan yarim himoyachi Maykl Olisening transferi haqida fikr bildirdi.

Kecha, 7 iyul kuni myunxenliklar 22 yoshli futbolchi bilan shartnoma imzolaganini rasman e’lon qildi.

“Maykl Olise - o‘zgarish qila oladigan futbolchi. U o‘yin uslubi bilan e’tiborimizni tortdi. Muzokaralar chog‘ida u tezda "Bavariya"ga o‘tishni xohlayotganini aytdi", - deya Eberlning so‘zlarini keltiradi Myunxen matbuot xizmati.

O‘tgan mavsumda 22 yoshli Olise barcha musobaqalarda 19 ta o‘yinda ishtirok etib, o‘nta gol urdi va oltita golli uzatmani amalga oshirdi.