Yaqinda UEFA rasmiy sayti Yevropa chempionati yarim finalida Fransiya darvozasiga Lamin Yamalning urgan goli turnirning eng yaxshi goli deb topilganini e’lon qilgandi.

Ammo muxlislarning ovoz berish jarayoni ham hisobga olindi. Unga ko‘ra Yamalning jarima maydonchasi tashqarisidan ajoyib zarba bilan kiritgan bu goli ikkinchi o‘rindan joy oldi.

Birinchi o‘rin Turkiya terma jamoasi a’zosi Mert Muldurning goliga nasib etdi. Gruziyaga qarshi o‘yinda futbolchi jarima maydonchasi chizig‘idan sovuqqonlik bilan zarba yo‘llagandi.

Uchinchi o‘rin esa aynan Gruziyaga qarshi o‘yinda kiritilgan Arda Gyulerning goliga nasib etdi - "Real"ning iqtidorli yarim himoyachisi o‘sha paytda to‘pni jarima maydonchasi tashqarisidan chap burchakka yo‘llab qo‘ygan.

To‘rtinchi o‘rindan Jud Bellingemning Slovakiya darvozasiga akrobatik uslubda urgan goli joy oldi.

Kuchli beshlikka Shveysariya va Shotlandiya terma jamoalari o‘rtasidagi uchrashuvda Jerdan Shakirining urgan goli yakun yasadi.