«Arsenal»ning yangi futbolchisi Rikkardo Kalafyori «Bolonya»dan «kanonirlar»ga o‘tgani haqida fikr bildirdi.

«Bu ajoyib tuyg‘u. Jamoa bilan mashg‘ulotlarni boshlash va muxlislar uchun o‘ynashni sabrsizlik bilan kutyapman. Aslida bu mening 12-13 yoshimdan beri orzum edi, chunki bu yerda Premyer-liga saviyasi va nazarimda dunyoning eng yaxshi futbolchilari to‘p tepayotganini ko‘raman. Bu yerda o‘ynash nafaqat men uchun, balki barcha futbolchilar uchun orzu», - deydi himoyachi «kanonirlar» matbuot xizmatiga.

Eslatib o‘tamiz, dushanba kuni «Arsenal» Kalafyori transferini rasman e’lon qilgan edi. "Transfermarkt" ma’lumotlariga ko‘ra, himoyani kuchaytirish «kanonirlar»ga 45 million yevroga tushgan.

«O‘ylaymanki, bu men uchun keyingi bir necha yildagi eng yaxshi loyiha va o‘ylaymanki, bu yerda o‘yinchi sifatida yaxshilanaman», - deya qo‘shimcha qildi Kalafyori.