Professional bokschilar o‘rtasida mutlaq jahon chempioni Oleksandr Usik ukrainalik bokschilarga Parijda bo‘lib o‘tayotgan Olimpiada o‘yinlarda sovrinli o‘rinlarni olgan sportchilar uchun mukofot pullari va’da qildi, deb xabar berdi milliy terma jamoa ustozi Dmitriy Sosnovskiy.
“Agar bokschilar Olimpiadada medal qo‘lga kiritsa, Usik mukofot pullarini shaxsan o‘zi berishini aytdi. O‘z hisobidan.
Sportchi birinchi o‘rin uchun – 80 ming dollar, ikkinchi o‘rin uchun – 70 ming dollar, bronza uchun – 50 ming dollar va’da qildi”, deya Sosnovskiy so‘zlarini keltiradi Reuters.
Ma’lumot uchun, Parijdagi Olimpiada o‘yinlarida uch nafar ukrainalik bokschi qatnashmoqda. Musobaqalar 11 avgustgacha davom etadi.
